行人天橋有好多好處，主要係用作步行，唔駛等交通燈過馬路，已經夠晒效用（utility），喺灣仔，不時人車爭路，等交通燈幾花時間，如果為咗趕時間，有天橋就好方便。當然，完全偏重天橋，忽視街道用途，亦屬規劃師失職。人之交流，往往在街頭，不是在天橋，行天橋係為效率，故此往返匆匆，行街道，就較為着重情趣（如拍拖、購物、欣賞小店老店……），總之行人各有所需，唔好話人在天橋上「大家好似死屍，左右各走一邊」，一位老友住在將軍澳──（左丁山好少去），就同左丁山講過：「將軍澳每間住宅大樓好似係一個孤島，街頭了無生氣。」點解會搞成咁，要問吓政府規劃師。
少見天橋，街道人頭湧湧，行街大把嘢睇，好有樂趣嘅地區就係深水埗，朋友係業餘攝影師，身為高級打工仔之時，已經每年趁放假旅遊之便，拍攝大量外國風景照片，退休之後，不時出外旅行攝影，回到香港又點呢？佢某日在網上搜尋旅遊照片網站，發覺有大量香港古老街景，於是頓然醒悟，自己過往拍攝大量外國景色之餘，忽略咗家鄉景色，於是走上街頭，影完又影。呢日在文咸東街附近見到佢，佢話想拍攝古老參茸海味老舖照片，在海味街活動咗一個星期。之前去過深水埗十日，發覺深水埗好好玩，街頭生氣蓬勃，細舖老舖雲集，在中環不能立足嘅小店，一一見番，拍攝對象，俯拾即是，又見有不少外國遊客，其中不乏專業攝影採訪拍照。點知道遊客就是專業攝影師呢？朋友L話：「現在冇晒黑房啦，一位以前幫我沖曬菲林嘅熟手技工，竟然在海壇街撞見，問佢有乜好做，佢話有位攝影朋友介紹，為一啲外國攝影名家做導遊，帶佢地在香港搜尋舊景觀供拍攝用，呢啲攝影師有啲名氣，針對外國人喜歡亞洲獵奇照片，於是到亞洲城市，專影古舊景色，然後出版圖片集。佢哋一走到深水埗就好鍾意喎！」每次香港有18區收入調查，深水埗總是排在後面，但正因為咁，不少古老事物反而保留下來，鴨寮街固然聞名世界，其他亦有回憶價值，朋友L小孩時代在油麻地長大，對深水埗亦有些少回憶，話要趁深水埗舊事物仍然存在之時盡量拍攝咯，深水埗勝在無乜行人天橋，在街道上遊走，饒有趣味，再經旅發局選咗深水埗區向海外遊客作重點推廣，於是更多外人到鴨寮街一帶尋幽探勝。