3月23日星期六上午，有啲時間，慢慢嘆報紙，平時未有時間細讀嘅長篇大論都睇埋，枱上有十張報紙，左丁山習慣企喺度彎腰閱報，足足企成兩個幾鐘頭，有衛生專家話，站立有益，左丁山雖然不知對身體何處有益，但諗住平日坐得太多，用站立方法睇報紙嚟平衡吓，怕會幾好啩。
睇到明報D6版有一篇「行人天橋，車才是用家」，撰文歐慧兒，當堂打個突，車怎麼會用行人天橋？於是耐心睇落去，文章有一段講灣仔行人天橋：
「興建行人天橋，除了建在哪，設計有否考慮行人感受亦是關鍵。陳祖聲分享自身經驗，『你如果有行灣仔港鐵站到稅務大樓那段，會覺得條橋都幾惡頂。大家好似死屍，左右各走一邊』。該天橋空間昏暗，令人一蹶不振，大家都不願多停留，只想一股勁往前走。」
上述呢段說話來自一位城市設計師陳祖聲，來自老牌建築公司巴馬丹拿（曾建中環多個天橋），左丁山經常使用呢條灣仔天橋，覺得陳先生講得嚴重啲噃，呢條天橋每日估計有十萬八萬人次行經，對接駁灣仔地鐵站與會展中心及君悅酒店，方便到極，若果冇咗呢條天橋，灣仔往灣仔北街道必定擠塞不堪。行人天橋梗係用嚟行㗎啦，邊個得閒在上面睇街頭風景呀，如果係遊客就話在天橋上影相啫。陳先生後來大讚金鐘港鐵站通往添馬公園嘅天橋，設計出色，行人如置身公園。鬼唔知，添馬係將港英時代軍艦停泊海灣填平嘅，填平之後任建築師設計，空間自然規劃得更好。灣仔天橋呢？天橋兩旁都係寫字樓與商業住宅，地方狹窄，根本毫無空間可言，可以建成一條直路天橋，已屬萬幸，點可以同添馬公園比較！灣仔天橋只有一個功能，就係接駁灣仔南北，在上面願停留嘅，只會係法輪功及反法輪功兩組「閒人」！他日如果「明日大嶼」可以順利落成，新增土地一千公頃以上，大把空間，城市規劃師設計師咪演吓身手囉。
香港天橋系統，最出色自然係中環，由聖約翰教堂落山，可以不經地面一路行到西港城，途經香港最重要嘅商業大廈與酒店，唔怕遠嘅話，由太古廣場行到西港城都唔使停落嚟等過馬路。一位上海大亨雖未行畢全程，已對相熟記者讚不絕口：「香港真方便，好過全世界，我由酒店去大銀行，去大律師行開會，傾掂後再去五星酒店餐廳食飯，都係行路，唔駛用車。在上海根本不可能，你去過浦東就知過馬路幾難！」行人天橋最重要之功能就是提供行路方便，要計埋空間美感，在香港嚟講係額外奢侈。