自由黨榮譽主席田北俊噚日喺facebook上載佢同啱啱出獄嘅新地前聯席主席郭炳江嘅合照，兩人拎住杯對飲、面露微笑，田少留言話「正面人生觀從Thomas（郭炳江）學起」，到底有乜好學呢？
八方問過田少，佢話噚晚同Thomas及一班朋友食飯敍舊，Thomas席間話日後會多做慈善工作，享受人生。田少直指：「我真係要讚吓佢人生觀嘅改變，有啲人如果好似有佢呢個經歷，可能會話法庭不公，但佢唔係，而係勸啲後生唔好學佢，佢真係一個好難得嘅商家。」
坐監要失去自由，但似乎郭炳江冇心生怨恨，反而喺獄中有過深刻嘅反省，難怪令田少有感悟。要知道郭炳江本來過着人上人嘅生活，但依然會喺錯誤中學習，實在唔似得有啲人咁，有錯唔認、逃避責任，仲要用語言偽術講到振振有詞，例如僭建處理咗就係冇僭建咁，難怪張凳坐唔暖。
田少亦意有所指同八方講，佢以前喺立法會同𠵱家嘅公司事務，都會做足申報，總之唔好俾人捉到話佢有問題。唔知欠7嘅數字先生聽到，會唔會別有一番感受？