因為涉及許仕仁貪污案入獄5年嘅新地前聯席主席郭炳江呢頭出獄，嗰頭又有新一輯《廉署行動》，咁啱又以上述貪污案做藍本，到底係攞景定贈興？抑或覺得啱晒時機係收視保證？
廉署趁今年成立45周年推出嘅呢輯《廉政行動》，名為《黃金枷鎖》嘅劇目，就係以許仕仁世紀貪污案做藍本，由於劇情豐富，仲分上下兩集播出，八方聽聞自《廉政行動》上世紀70年代推出至今，今次係第二次有故事要分兩集播。
于洋演郭炳江
人稱「肥龍」嘅許仕仁官拜政務司司長，係特區政府第二把手，一度權傾朝野，當然要搵番咁上下份量嘅重量級演員扮演，人稱「肥貓」、兩奪影帝嘅鄭則仕劇中就扮演前政府高官靳東堯。
八方睇過預告片，肥貓無論身形同神態，都好有肥龍嘅身影。案中另一重量級主角郭炳江，就由資深演員于洋飾演。眾所周知，肥龍生活奢華，出入高級場所，本身又係馬會董事兼馬主，為加強真實感，劇集租借高級場所同馬房作實景拍攝，聽聞仲會呈現傳說中嘅許仕仁千呎「音樂圖書館」。
除咗《黃金枷鎖》，呢輯《廉政行動》仲揀咗以名校教師索賄案為藍本嘅《初心》，「蝦頭」楊詩敏扮女教師，亦有米芝蓮星級食府「胡同」廚師貪污案為藍本嘅《逆流》。呢輯一大特色係以兩名調查員橫跨10年調查成長經歷貫穿四個故事，緋聞男女陳家樂同陳瀅飾演呢兩名調查員，下周六起一連五個周六晚9點半喺無綫翡翠台同大家「查案」。
李八方