近期有唔少英超球隊，包括曼城同車路士都已經公開咗今年夏天將會嚟亞洲踢季前熱身賽，而喺亞洲地區有最多Fans嘅曼聯，周三亦喺自己fb公開咗話七月會東征，先同國際米蘭喺新加坡上演國冠盃比賽，之後再飛到去上海鬥熱刺，然後八月就返番英國，去卡迪夫再同AC米蘭對戰！
香港時間星期三朝早11點半左右，曼聯就喺官方fb發文，話將喺7月20日會同意甲勁旅國際米蘭喺新加坡友賽，打完國際之後，就會飛去中國上海，25號同熱刺嚟場友賽，之後就結束東征，返到卡迪夫約戰紅黑軍團AC米蘭。紅魔較早前已經公佈會先去澳洲嘅珀斯，同珀斯光輝及列斯聯分別喺7月13及17日友賽，呢五場波中間仲會唔會有其他友賽加插，就要再睇睇紅魔有乜新安排。另外，英超嘅熱刺同意甲嘅祖雲達斯亦會到訪新加坡，喺7月21日出戰國冠盃比賽，而祖雲達斯之後仲會喺24日同國際米蘭，去中國上演意大利國家打吡。
曼聯自2014年開始就有參與國冠盃，過去大多數都係出戰北美賽區比賽，除咗16年試過同同市宿敵曼城，同埋德甲嘅多蒙特一齊出戰中國賽區賽事。當年同曼城喺北京鳥巢嘅一戰，就因為球場受連日大雨影響，草地質素太差所以踢唔成，而上年都有傳出過，紅魔將會喺今年到訪香港，同熱刺踢國冠盃比賽，但家陣就已經確定咗鬥熱刺嘅比賽，將會喺上海上演。
雲92笑蘇B泊大巴
講起曼聯，近期宣佈退休嘅前紅魔主帥雲高爾最近就接受咗《BBC》嘅訪問，當中就梗係有講到家陣嘅曼聯。「敢帥」雲高爾繼續佢敢言嘅作風，直指現任曼聯領隊蘇斯克查同上手嘅摩連奴戰術根本冇分別，都只係「泊大巴」，「喺我之後嘅領隊（摩連奴）改用『泊大巴』戰術，踢穩守突擊。家吓換咗另一個主帥，佢都係『泊大巴』同踢穩守突擊。摩佬同蘇B嘅最主要分別，係蘇B識贏波。」不過，雲帥都讚蘇B喺運用保羅普巴上，比摩佬更加出色，隊波都發揮得好咗。
傳摩佬下家喺法甲
另一位前領隊摩連奴早前曾經多次表態今年夏天就會強勢回歸執教嘅佢，最近就被法國傳媒《隊報》爆佢下一支執教嘅球隊將會係法甲球會。不過，竟然唔係班霸巴黎聖日耳門，據知可能係家陣排法甲第三嘅里昂，又或者曾經深陷護級漩渦嘅摩納哥，如果係真，都相信跌爆唔少球迷嘅眼鏡。