【黑鏡線索】
朋友章濤（UDomain創辦人）寫了篇文講創業business plan，佢話，要估邊啲startup項目唔掂，其中一種，就係「計劃完美、部署周詳，團隊中各人的教育背景、工作經驗、分工模式也無懈可擊，甚至由過程的第一至一百步都已經構思好的項目……團隊的視野會被『完美』計劃限制，太依循原定的路線圖，未能因應市場的變化而作出快速調整。」
掉番轉頭，其實好多創業人根本唔鍾意寫business plan，咁點解咁多人會寫？佢解釋，因為坊間充斥着各種各樣的創業資助計劃、天使基金，政府部門嘅、大學嘅、私營企業嘅，多不勝數，委員問得仔細，創業者就惟有準備得更詳盡，最後造成一個惡性循環。
到底business plan係咪咁冇用？我覺得，本身其實有啲用處。創業其中一種錯誤，係公司欠缺基本諗法，例如顧客對象，或者間公司stand for 啲乜，或者諗住燒定賺。欠缺，可能係真係冇諗，可能有諗但搖擺不定，亦可能係唔同人有諗法但係冇寫低，所以隨時部門之間，隊友之間，仲以為方向一致，點知其實有偏差都唔知。結果大家嘅努力互相抵銷，與其辛辛苦苦抵銷，不如拉大隊去加勒比海度假好過啦。
所以，叫business plan又好，叫handbook又好，基本思想要寫低，畀大家睇到同運用係好重要。創業人梗心急，咁多嘢做唔切仲走去寫嘢？咁多時間不如落手做實事好過。呢種心態好正常，問題係，要自己解答，到底一間公司嘅價值，幾多嚟自實際成品，幾多嚟自成品背後嘅作業系統。我嘅經驗同觀察係，唔願意花足夠時間step back諗清楚傾清楚嘅例子，遠多於花得太多。
但我同意，喺肯寫低嘅人裏面，好多時會誤用咗呢個工具。一種誤用，係淨係寫嚟比出面投資者睇，冇分享畀同事睇。寫低最大嘅好處，係令團隊向同一方向划船，划船嗰個又唔係投資者，唔畀團隊睇到就太浪費。第二種誤用，係寫咗唔用，淨係用嚟貼吓海報，封吓塵，日常決定完全冇參考到，咁都係廢。
另一種誤用，係誤會咗佢嘅本質，到底寫低嘅嘢，係刻喺石頭上嘅十誡，抑或一擦即甩嘅粉筆草稿？好明顯，唔同嘅態度，效果上有好大分別。又另一種錯法，係當耳邊風，咁同冇寫冇分別。仲有一種錯法，係當《聖經》，冇晒調整嘅彈性。其實唔一定要一刀切。合理嘅做法係，越大嘅框架寫實啲，越細節執行嘅寫虛啲；越近嘅嘢寫實啲，好多步以後嘅嘢寫虛啲。寫虛啲，唔一定含糊，可以好清晰，但係寫到明有好多改變嘅餘地。邊度填色，邊度留白，就係創業人嘅技巧。
好似足球咁，冇理由因為唔知對手將會做乜，就決定冇戰術，戰術未必啱，但至少令球員有一個統一諗法去執行。踢踢吓，發現唔對路，就梗係睇情況調整，冇理由一成不變。我同意章濤講，任何聲稱幫startup嘅機構，用資金迫令startup一成不變咁執行明知要改嘅戰術，係超低能冇人贏嘅做法，不如直接倒落海，起碼慳返大家時間。
撰文：宋漢生