李永達噚日幫自己新出嘅回憶錄搞發佈會，成班政界老朋友赴會撐場，而689噚日亦為高達贈興，再喺fb出post話高達指每日有40個中共地下黨員，揸單程證嚟香港有特別任務係靠嚇，不過最奇嘅係，689竟然話「香港有中國共產黨黨員，正如有其他國家的政黨黨員，沒有新聞價值」，即係連港澳辦、西環都唔敢認香港有中共地下黨，689竟然公開承認，真係奇怪！
問高達拎簽名
689鬧高達之餘，例必鬧埋登呢啲內容嘅《蘋果》，但鬧鬧吓又突然話，「蘋果日報出得廳堂，入得課室，是通識課教材，是民主派的頭號大報，應該注意下水平吧」，八方冇諗過原來689咁睇得起《蘋果》！最好笑係689話高達本書太誇張失實，可以做反民主黨競選工具，但又話「絕對有收藏價值」，仲要「必須有作者親筆簽名，恐防日後有人反口」，仲問李永達敢唔敢同佢簽名，高達就同八方講，要親筆簽名好易，叫689上民主黨買佢回憶錄，高達話一定幫佢簽。
對於689係咁追住咬，高達就話識咗689好多年，知佢最鍾意狡辯，講嘅嘢會有少少事實，又有少少扭曲，至弊佢連書嘅內容都引用錯！佢話689未睇過本書，所以唔怪佢，但覺得陳淨心都坦白過佢。
高達又話計劃出回憶錄下集，又話仲有好多秘聞未寫，但坐監冇得用手機語音打字，到時惟有寫住大綱。