與兩位中大師弟講IT軟件、硬件，又增加常識，講講吓，知道師弟創辦嘅公司已打出名堂。客戶之中不乏本港大企業，應該有資格上市有餘，於是舊職業病又發作，忍唔住問：「點解你哋唔上市？我隨時可以介紹保薦人。」主席S搖頭：「做私人公司好過，搞上市好麻煩，會分心。大把人接觸過我哋，一於唔制之嘛！」總監P又話：「要擴充發展，目前並不缺錢，一開聲就有不少PE（私募基金）肯同我哋傾！」既然如此，上市唔諗住，專心做好生意及技術，十分正道。
忽然間醒起，前兩日公子L搵左丁山食午餐，講音樂芭蕾舞之餘，佢提到老友記R不久即將接任馬時亨之地鐵職位，有啲擔心，一講到老友R，抬頭一望，竟然見到大教授何文匯坐在公子L後面，何教授又竟然會問到：「左丁山，你位朋友R會做港鐵主席喎！」教授真好記性，好多年前，因佢身高、瘦削、滿頭白髮，與朋友R相似，於是搵埋兩人一齊吃晚飯。佢兩位你望我，我望你，互相一笑！朋友R有乜好擔心吖，到佢上任之時，馬時亨應該已處理妥當一切意外事件呢、棘手事件呢！朋友R其實夠運，如果佢上任之後先至發生地鐵列車相撞事件，咁就麻煩到極。
因公子L提及地鐵意外，呢日左丁山問兩位IT專家：「泰國有朋友話畀我聽，舊式訊號系統係兩車進入車軌之時，在一段安全距離內（例如二百米），控制室嘅A軌就會亮燈，另外一架對頭車會知道，不能同時轉入同一軌道，避免相撞。香港呢次發生撞車，係取消舊方式，改用WiFi通知對頭車，但WiFi有障礙，故此撞車！」吓，咁樣咪愈先進，愈易生意外。以此問總監P，佢話：「你嘅泰國老友知其一。據我哋了解，香港地鐵班次頻密，係世界之最，如要擴容，增加班次嘅話，可以將安全距離縮短，將靜態制約（硬性預定安全距離）改為動態制約，即是透過數碼監控縮短兩列車之安全距離，從而增加班次，理論上、技術上係可行嘅，測試過N次都掂。再做危機測試，假設系統受損，用back-up（後備系統）補上，測試又掂，然後最後測試，假設系統down咗，back-up又down埋，於是動用第三後備back-up之back-up嚟測試，哎吔，點知可能計算程式有誤差，back-up之back-up竟然彎咗，人手冇得救咯！」咁算係極不好彩，還是倚賴WiFi科技太過？一切有待馬時亨宣佈調查真相！