李永達回憶錄仲爆咗民主派好多秘聞，好似書入面有一段提到已故民主黨元老司徒華叫高達留意黨內三個人，一個係單仲偕，一個係黃成智，一個係馮煒光。民主黨內好多人唔明點解華叔咁唔like單雞，高達就同八方講，原來單雞除咗「太貪玩」外，仲有個「罪名」係唔聽教成日嚇親華叔。
話極都唔聽
高達話係舊立法會大樓年代，會議廳座位枱面有一塊板可以拉出嚟用，議員離座時要推番埋塊板先起到身，當年單雞坐喺華叔後面，每次起身都會大力推埋塊板，結果成日嚇親坐前面嘅華叔。高達話華叔每次都會叫單雞細力啲，但單雞通常改善咗一星期左右又會嚟過，於是華叔又話佢，單雞又改一陣……如此無限loop之下，華叔就唔高興單雞唔聽教。八方問單雞，佢認華叔當年成日話佢太大力推塊板，但單雞話有苦衷，當年佢開會要用電腦，枱面唔夠位放先拉塊板出嚟，但華叔一向只會寫字，自然唔使用塊板，所以佢唔係有心唔聽教㗎！