李永達出回憶錄，入面爆嘅秘聞《蘋果》呢兩日都有報道，好多人對入面嘅內容好感興趣，聽聞唔少朋友同街坊叫高達留定書畀佢哋。高達喺書中大爆每日150個單程證配額入面有30至40人係中共派嚟有特別任務嘅地下黨員，更令前特首、全國政協副主席梁振英喺facebook反駁。不過689咁樣做，不但冇辦法同中共開脫，反而令更多人信真有其事，仲曲線引咗班人證出嚟話真係有唔少中共黨員成日嚟香港做嘢。
陳淨心：每日40個咁少？
話說689喺facebook反駁高達，話每日邊有30至40個單程證人士係有特別任務嘅地下黨員，但有民主派中人同八方講，有朋友同街坊話原本對高達說法半信半疑，不過689咁否認，大家即刻覺得應該係真，因為689以往唔認嘅嘢通常都係堅嘅，佢話係嘅嘢就通常都流嘅，好似佢話有證據證明傘運有外國勢力，但到今日連北京都拎唔出證據證明有乜嘢外國勢力。
最好笑係689班支持者喺facebook留言撐佢，陳淨心留言話「而家共產黨員好失禮呀？共產黨員係國家最頂級嘅精英，每日40個咁少？落150個都唔嫌多呀！」仲有疑似內地人留言，話香港周街都係內地共產黨員，「我爸爸都係黨員，已經退休，一年過香港四五次，還有我伯伯、我伯母也是黨員。他們女兒嫁在香港。一年係（喺）香港好多時間。問下，他們驚唔驚啊？」變相證明高達冇講錯，真係好多地下黨員喺香港。
李八方