兩年一度嘅英超亞洲盃今年唔喺香港搞，改咗喺中國舉行，不過，香港球迷今夏仍有機會現場睇到英超勁旅訪港進行季前表演賽。據報英超冠軍曼城踢完喺南京同上海嘅英超亞洲盃後會順便嚟香港，7月24號喺香港大球場踢季前賽，而對手可能係港超聯球會傑志。咦？曼城？大球場？唔知會唔會重演2013年曼城喺「薯仔田」變國際笑柄單嘢呢？
一星期飛盡中港日
英超賽會禮拜三公佈曼城、韋斯咸、狼隊同紐卡素，喺七月會去中國參加分別喺南京同上海兩個城市進行嘅英超亞洲盃。再次嚟亞洲備戰新球季嘅曼城，早前就宣佈踢完英超亞洲盃後，會喺7月27號飛日本友賽橫濱水手，消息指，曼城會順道嚟香港，喺24號同近年曾邀熱刺、巴黎聖日耳門、曼聯同阿仙奴等訪港嘅傑志，進行季前表演賽，地點就梗係香港大球場啦。曼城20號踢完英超亞洲盃，翌日抵港，24號就對傑志，之後就轉飛日本準備對橫濱水手嘅季前賽。
大球場成國際笑柄
由西班牙領隊哥迪奧拿帶領嘅曼城，陣中坐擁阿古路、大衛施華、加比爾捷西斯、奇雲迪布尼同利萊辛尼等頂級球星，星味十足。曼城近年多次訪港，08年季後曾經同祖雲達斯喺香港踢雙料表演賽，對上一次係2013年踢英超亞洲盃，當年大球場受連場天雨影響，第二日喺泥濘草地上進行，當時帶領曼城嘅主帥比歷連尼仲話決賽場波似「泥漿足球」，因為前鋒尼格度喺一次同新特蘭守將奧沙喺空中爭頂時，成個人兜口兜面咁直仆落塊泥地度，成口泥喺個嘴邊，亦成身都係泥濘，自此就有咗「泥格度」嘅稱號。
雖然曼城最後以1:0贏波捧盃，但呢單新聞就成為國際笑柄，世界各地好多媒體都有報道，康文署之後重鋪大球場草地同成立專案小組補鑊，但成效就似乎一般，草地專家李賢祉仲炮轟康文署管理不善，後尾仲辭去專家小組成員一職。「藍月」今次重臨香江，已經冇咗「泥格度」，但當年有份隨隊嘅阿古路、費蘭甸奴、高柏尼同大衛施華，唔知再臨呢塊「大農場」會唔會猶有餘悸呢？