潮流興科創，讀電腦、資訊科技與工程嘅叻仔叻女，人人有個夢想，希望有朝一日成為馬化騰、汪滔，讀生物科技就以盧煜明為偶像。（按：馬雲係讀英文嘅，文學院學生亦可發吓夢。）世姪F自外國留學回來，有電腦/訊息工程碩士學位，諗住搵工不愁！點知碰壁幾個月，幾無癮，後來左丁山透過電腦J得悉，一間軟件公司有工搵人，而公司求才若渴，立即將世姪F背景通知電腦J，個零星期後，被知會世姪F已返工。原來搵工都係除咗識字之外，還要識人。
於是叫電腦J搵埋該公司主席及CTO（首席科技總監）一齊吃餐午飯。電腦J話約好去海逸酒店三樓，左丁山矇查查，走咗去油街嗰間酒店，搵勻三樓五樓都唔見人，於是急call電腦J，佢話：「你擺烏龍了。海逸酒店在大酒店隔籬。」哎吔！好彩行出街即刻有的士，去鰂魚涌地鐵站附近嘅海逸酒店，遲晒大到。
一見面，原來兩位公司高層係中大師弟，主席在新亞讀物理，CTO在崇基讀經濟，咁就更加親切。聽佢哋講科技現況，得益良多，當然問及5G啦，兩位都話，由於需要巨額投資，好多國家都冇錢，要做就要用價格上最便宜嘅華為產品及技術，連德國都因為要慳本，拒絕美國壓力，准許華為參加德國5G頻譜招標也。香港更加唔使講，全面搞5G，言之尚早。
佢哋公司最近專同商場搞WiFi方案，香港人鍾意用WiFi，又鍾意fb，去到商場就會用商場嘅免費WiFi。於是所有行蹤立即可由電腦系統知道，佢哋兩位打開手機，就知道某個商場嘅人流聚集在甚麼餐廳及店舖，公司會將啲customer data交番畀商場管理公司，做data analysis，左丁山問：「我成日去呢個商場，有乜辦法逃過你耳目。」CTO話：「你閂咗WiFi用番電訊公司網絡囉，電訊公司會知你喺邊，但我哋及商場唔知，不過你係老派啫，年輕人邊度會唔用WiFi！」收集咁多資料如何運用呢？主席話：「咁我哋不斷請軟件工程師分析數據，為客戶提供市場推廣意見嘅，但呢行人才缺乏，有經驗之人好渴市，所以我哋好肯請新畢業生去訓練！」哦！唔怪得之其他公司嫌新畢業生剛出道唔肯請，呢間校友創辦嘅公司唔想搶吃即食麵，願意花啲時間栽培新人，於是世姪F就被佢哋相中。左丁山又懵懵哋問：「究竟我點樣可以保持私隱？」CTO話：「唔好咁天真，你一用WiFi，再上fb，就好難有私隱！」