由簡拿華路（小圖）帶領嘅國足（紅衫）星期一出戰中國盃季軍戰，全場冇乜神氣之下，以0:1不敵中亞球隊烏茲別克（白衫），連續兩屆比賽都係得殿軍，三屆中國盃法定時間未贏過，認真羞家！上半場33分鐘佢哋仲俾睇低一線嘅烏國攻破大門，國足中堅高准翼解圍失誤，效力俄超羅斯托夫嘅烏國快翼蘇梅洛度夫右路力壓國足守衞殺入禁區，超窄角度射破顏駿凌，領先1:0。下半場國足依然冇咩起色，最尾輸0:1再次喺中國盃墊底。
中國盃自2017年起開始搞，國足喺第一屆嘅季軍戰憑互射12碼擊敗克羅地亞，之後一場都未贏過，今次仲係連續兩屆喺呢項賽事墊底，相當唔掂！至於烏拉圭喺冠軍戰就贈泰國四蛋。