每逢球會唔使踢比賽，好似國際賽周呢啲咁空閒日子，啲名宿就好興走埋一齊踢元老賽畀班球迷懷吓舊，自己又可以過吓波癮咁，好似上周六嘅晏菲路，就有場歐聯復刻決賽上演，由利物浦元老隊大戰AC米蘭傳奇隊。
馬甸尼有傷冇落場
雙方曾經喺2005同07歐聯決賽交手過兩次，各贏一次捧盃，但如果問紅軍球迷，佢哋一定好懷緬05年嘅伊斯坦堡奇蹟夜，上半場落後三球下，下半場竟喺7分鐘內追和3:3，最後終於射贏埋12碼捧盃。嗰場波最終帶住紅軍走上頒獎台、捧起歐聯獎盃嘅神奇隊長謝拉特，估唔到呢場元老賽都仲係咁神奇，最尾又靠佢射入一球靚波絕殺，幫利記傳奇隊奠定3:2勝局，睇到班紅軍球迷真係好熱血。
好多當年有份踢05決賽嘅兩軍名將，都有份踢呢場比賽，好似謝拉特、卡卡、恩沙基、加歷查、卡富、派路同史米沙等等。另外，科拿、魯殊同奧雲亦有份助陣，兩邊教練就分別係杜格利殊同安察洛堤，只係有啲可惜家陣做緊教練嘅舒夫真高同基斯普，以及昔日謝老四嘅中場拍檔沙比阿朗素唔得閒出席，更美中不足係有份喺米蘭大軍名單嘅馬甸尼，就疑似有傷冇落場獻技。
論元老賽嚟計，呢場波都算幾高質，又多入球。紅軍先由科拿喺上半場開紀錄，換邊後再靠前法國射手施斯增添比數，但米蘭及後靠兩個靚波追平，先有派路百步穿楊，一腳靚罰球令紅軍門將韋斯達維特完全冇反應，只能目送個波入網，之後再有彭卡路一腳禁區外香蕉波射入死角。正以為呢場波會和氣收場，點知紅軍由謝四喺禁區頂先用左腳假動作呃過對手，再右腳直抽遠柱彈地入網，最後就帶領紅軍以3:2贏咗呢場比賽；記得05歐聯決賽，就係謝拉特喺下半場開波冇耐，接應懷斯傳中頂入追近1:3，為絕地反擊埋下伏線，點知14年後又扮演多次關鍵角色，神奇隊長嘅稱號，真係唔係浪得虛名。
期待紅軍英超封王
雖然家陣謝四已做咗格拉斯哥流浪教頭，但佢仍然心繫紅軍，好關心一班後輩今季捧唔捧到球會史上首個英超寶座：「信我，我覺得紅軍感受到好大壓力，尤其球迷都期望可以第一次喺英超封王。我係教緊格流，所有精神都放喺呢隊波，但我都有留意利記，因為如果佢哋奪冠，我就係全世界最開心嘅一個。」