今屆中學文憑試（DSE）呢個月12號開考，政務司司長張建宗噚日喺網誌發文，話佢上星期錄咗條短片為DSE考生打氣，噚日仲放埋上facebook，呢條片亦貫徹小肥張鍾意玩食字作風，不過今次玩英文食字，唔係玩中文，但似乎唔係咁多人識欣賞。
拍片鼓勵DSE考生
小肥張喺片入邊用「H、K、D、S、E」五個英文字母鼓勵考生，即係香港中學文憑試英文簡寫，呢五個字母分別係H代表Hard work（努力），K代表Knowledge（知識），D代表Determination（決心），S代表Self-confidence（自信），E代表Endurance（堅持），小肥張希望考生只要對自己有信心，用平常心迎接挑戰，就能發揮應有嘅水準，又話公開考試只係漫長人生中其中一站，考生只要認識同發揮自己嘅強項，保持積極樂觀心態，人生同樣係充滿機遇和色彩。
不過小肥張呢個食字po，到噚晚仲係不足80人畀like或心心，呢班人入面仲已經包括埋佢嘅下屬、政制及內地事務局局長聶德權在內。其實小肥張以往成日玩食字，不過就連佢嘅政府同事，有時都覺得佢玩太爛，好似有次佢出席一個課程結業禮，小肥張話自己工作範疇「跨局、跨界別、跨世代、跨組別」，所以自嘲佢嘅花名叫「跨張」，總之跨親啲嘢都搵司長，不過台下聽到都覺尷尬，但佢似乎唔覺，繼續樂此不疲玩食字。
李八方