《香港01》創辦至今，外界對呢個網媒有好多唔同睇法，創辦人于品海日前去港台節目《鏗鏘說》接受羅永聰訪問，佢又真係好坦白喎，例如佢話新聞審查係必然發生，又話記協成日企喺道德高地干預記者工作，仲大讚成日俾網民恥笑嘅官媒《環球時報》，話《環時》代表「中產」同「普羅大眾」嘅角度喎！
話記協站道德高地
《香港01》曾經因為加「編者按」表達反台獨立場，畀記協發聲明質疑，于老闆似乎有啲不滿記協，話記協成日都以為自己擁有道德高地，話畀全世界聽應該點做記者，于老闆話咁樣講已經干預緊啲記者喇！又話如果嗰個記者真係贊成個政府政策，點解一定要佢批評？至於大家成日擔心嘅新聞審查，于老闆又有佢自己獨特見解，話傳媒有審查係必然，傳媒編輯已經係一種審查喇！所謂Editing（編輯）同censor（審查）條界線要點劃分，係啲人諗出嚟！
于老闆喺訪問入面，仲大讚《環球時報》代表「中產」同「普羅大眾」角度，大陸中央台13台做得唔錯，而美國《紐約時報》及英國BBC部份內容都好，至於佢旗下雜誌《多維》成日用習近平做封面，于老闆梗係不忘大讚習喺軍改、經濟以至扶貧政策做得好好，但都有話習嘅言論管制做得好差、管得太多。