英格蘭上周五喺歐洲國家盃外圍賽旗開得勝，喺溫布萊主場橫掃捷克5:0，最威當然係效力曼城、今季腳風順到有機會問鼎年尾英足先生嘅史達寧，今場大演「帽子戲法」之餘，仲博埋球12碼送畀隊長哈利卡尼射入。上一位喺溫布萊連中三元嘅英軍球員，已經要數到2010年嘅迪科爾，佢亦喺歐國外對保加利亞時「戴帽」，但史達寧今個月較早前先幫曼城入完三球，直情可媲美傳奇射手舒利亞，一個月內連續喺英超同國際賽都「戴帽」。
英軍呢場波對住捷克，上半場24分鐘已靠史達寧打開缺口，呢個入球賽後仲被英媒大讚抄足哥迪奧拿嘅Tiki-Taka風格，皆因入波前一共傳咗25腳冇斷過，場上11人只有迪利阿里一個冇掂過波。不過呢球只係史達寧個人騷嘅開始，佢喺上半場補時階段再博到12碼，由卡尼操刀射成2:0完半場，呢位快馬換邊後再喺62同68分鐘入波，成功「戴帽」，加上捷克中堅卡拿斯擺烏龍，幫英格蘭埋齋大勝5:0。
月內兩中三元媲美老舒
賽後焦點當然落喺史達寧身上，除咗因佢係近九年首位喺溫布萊「戴帽」嘅英軍球員，根據《Opta》嘅數據，史達寧仲同前英格蘭隊長舒利亞睇齊，一個月內連續喺英超同國際賽都入三球或以上。舒利亞喺1999年9月4號場歐國外比賽連中三元，幫三獅主場大勝盧森堡6:0，相隔兩星期，又幫紐卡素喺主場以8:0大炒錫周三中獨取5球；史達寧就同佢掉轉，先喺今月九號對屈福特場英超，個人包攬3球助曼城贏3:1，之後再喺國家隊發威。不過，佢就因為「戴帽」後，揭起波衫展示一件有佢亡友多堅斯張相嘅底衫慶祝，可能會令佢俾歐洲足協罰。多堅斯係一位13歲嘅水晶宮青年軍球員，日前因白血病離世，史達寧之前都有去探過佢，呢位曼城翼鋒就話咁做係想佢家人得到安慰。
三幼獅登場辛祖好對辦
除咗史達寧，隊內兩位「幼獅」亦藉呢場波以後備身份處子登場，包括早前被愛爾蘭指叛國為英軍披甲嘅迪格蘭賴斯，同埋啱啱破紀錄成為三獅最年輕上陣球員嘅赫臣奧杜爾，但輪搶眼程度，當然唔夠今季喺多蒙特踢到風生水起嘅查頓辛祖，呢場又助攻史達寧入波，但就傳佢夏天可能轉會曼聯，皆因有媒體爆紅魔派代表同辛祖經理人接觸，唔知今次真唔真？