呢排唔少上市公司公佈業績，曾經同李超人friend過打band嘅四叔前日更加宣佈退任，由兩個仔分掌中港生意。正當各媒體大寫四叔歷年大事之際，八方就留意到唔同報章寫四叔嘅歲數竟然有出入！《蘋果》寫四叔同超人都係91歲，但至少有兩間媒體寫佢係90歲，更起埋大題寫「上月剛滿90歲」。就連浸大嘅校網，介紹2011年頒發榮譽工商管理博士畀四叔嘅頁面內容，都係寫1929年出世（即90歲），咁究竟四叔係90歲定91歲？八方當然冇法子當面問四叔本人，所以只有親自向恒地公關求證，究竟四叔今年幾多歲、佢係幾時生日呢？恒地公關之後回覆八方，原來四叔嘅出生日期係1928年1月29日，計翻日子即係今年91歲先啱，大家以後記住啦！