亞洲盃失敗之後，國足似乎仲未振作，星期四主場出戰中國盃四強又輸波，以0:1不敵泰國，無緣出戰決賽。有中國媒體放風，足協一早已經為暫代教練簡拿華路準備咗合約，但第一場教就輸，好有可能會影響佢坐正。
中國喺今屆亞洲盃失望出局，8強俾西亞強國伊朗橫掃3球，教練納比相當冇癮，賽事之後就冇做，接任主帥嘅係佢愛徒大簡，佢同納比聯手幫意大利喺2006世盃登頂，本身亦喺中國球壇打滾多年，教過廣州恒大同埋天津權健（天津天海），適應唔係問題！
今年嘅中國盃戲碼比上年失色，冇咗由加里夫巴利領軍嘅威爾斯，同埋有柏德列舒希克壓陣嘅捷克，改由泰國同烏茲別克兩支亞洲隊頂上，原本好彩仲有上屆冠軍烏拉圭以衞冕身份撐場，點知最強射手蘇亞雷斯因傷退隊，戲碼真係失色好多。中國盃繼續喺廣西南寧踢，不過佢哋就冇咗靈魂人物武磊，冇入選國家隊嘅佢返咗去上海上港探舊隊友。
「泰國美斯」反轉國足防線
講番場波，國足有唔少新面孔，包括前鋒董學升同中堅高准翼，郜林同于大寶就冇入選。國足上半場踢得好被動，傳送斷纜非常多，對住「泰國美斯」猜拿迪普桑格辛更加冇晒計。上半場14分鐘泰國有黃金機會，「美斯」獨闖龍潭，中國守衞好似雪糕筒咁俾佢扭過，但最後射得太正，俾門將顏駿凌沒收。
對住泰國嘅快速打法，去到33分鐘國足終於失波，泰國翼鋒鐵迪盼右路地波傳中，「美斯」喺中路插入破門，領先1:0。完半場前國足有黃金機會，前鋒韋世豪同隊友撞牆配合落底線窄角度射門，但泰國門將施華勒第一時間擋出，佢之後再化解韋世豪嘅補射，泰國半場維持1:0領先優勢。
連續三屆中國盃爭季軍
易邊後，國足表現冇乜起色，仲差啲失多球，57分鐘「美斯」左路一直快放入禁區起腳射遠柱，顏駿凌瞓身僅僅撲出。到62分鐘，國足有次難得嘅埋門機會，前鋒董學升竟然頂高，錯失追平機會。泰國最後贏1:0殺入決賽，國足就連續三屆都只可以喺地頭踢季軍戰。