早前登報同阿仔陳崇輝脫離父子關係嘅陳金華，最終喺打鼓嶺坪洋村當選村長，相反阿仔就落敗成為「三失」，一次過冇得做村長、鄉委會主席兼北區區議會當然議員。成功撼低阿仔後，有指陳金華擬向身為坪洋居民代表嘅阿女陳月明挑機，爭做打鼓嶺鄉委會主席，但噚日結果大團圓結局，陳金華雖然有參選執委並當選，但冇力爭更上一層樓，陳月明最終喺無競爭下當選打鼓嶺鄉委會主席，係香港史上首位女鄉頭。
查實喺九個席位嘅執委會選舉中，陳金華同陳月明呢對父女檔都好高票，阿女以31票登榜首，老竇就以27票緊隨其後；之後改選正、副主席，早前話有意競逐主席嘅陳金華最終冇參選，由陳月明自動當選。陳金華之後同傳媒講，自己年紀大兼身體差，所以唔選主席，又大讚阿女能力高，對佢揸旗鄉委會相當高興。