早排有個小朋友參加嘅「精靈寶可夢」填色比賽，得獎作品竟然靚過好多大人畫嘅畫，搞到好多網民提出質疑，小朋友有冇可能畫得咁靚？早排瑞典傢俬品牌IKEA又搞咗個毛公仔繪畫比賽，嚟自香港嘅五歲小朋友吳穎晞Darren畫嘅彩虹小子打敗全球逾8.7萬份作品勝出，雖然吳穎晞嘅彩虹小子畫得好簡單，但網民就激讚睇得出係出自小朋友嘅手筆，話呢啲先係真．小朋友比賽。
IKEA日前公佈毛公仔繪畫比賽結果，六個優勝作品嚟自塞浦路斯、希臘、約旦、西班牙群島、德國同香港嘅吳穎晞，吳穎晞設計嘅彩虹小子其實係一條着紫色襪嘅彩虹公仔，評判形容呢隻公仔將彩虹由天空帶到地上，又為佢着上溫暖嘅襪子，柔軟到令人愛不釋手。
製成限量版毛公仔
IKEA會將得獎公仔，當然包括彩虹小子製作成限量版毛公仔喺今年秋季發售，而IKEA兒童產品開發團隊正研究點樣可以將作品細節百分百呈現，好多網民就大讚彩虹小子畫得唔算靚，但睇得出係出自五歲小朋友手筆，話呢啲先係真．兒童作品，先係真正嘅兒童畫畫比賽，又話到時一定買番隻支持。
李八方