3月22日，如無意外，巨型KAWS COMPANION膠公仔開始在維港暢泳。說如無意外，只怪這東西劣評如潮，疑似浮屍，贊助單位做航空業，好死不死近日嚴重交通事故特多，大吉利是，更兼民怨沸騰，隨時取消可也。
同膠唔同命，六年前那隻黃鴨Rubber Duck受歡迎得多。噱頭這回事，第一個發明的是天才，之後執口水尾者，註定遭睇低一線。
但我要講的膠事不單於此──對，為什麼黃鴨受歡迎？諗深一層，同樣阻塞航道不特止，咁大塊膠飄浮水面，缺氧會否影響海洋生態？更重要是，浪費了幾許原材料呢？能否循環再生？用少萬千個膠袋都補唔番條數啦。而KAWS COMPANION又比Rubber Duck長一倍，長過成艘天星小輪，遺害不淺。
為什麼黃鴨受歡迎？當年說法是傳播正能量，為香港打打氣喎。其實根本膠事，社會精英掌握着綠色話語權，他們覺得黃鴨可愛就一味讚，忽略其不善之處，一句到尾，有佢講冇你講。
類似的雙重標準俯拾皆是。為喚醒小朋友廢物利用，例牌舉辦飲管藝術品創作比賽。何來咁多舊飲管？於是，學生和家長第一件事到超級市場大手掃入一包包新飲管。一千幾百件小學雞作品無論獲獎與否，不久勢成為堆填區新垃圾，跟環保原意背道而馳，你話膠唔膠？
口號嗌得最響者，往往是吃飽了撐的。為什麼名媛零舍鍾意呼籲不要穿皮草？為什麼不呼籲素食？飼養動物取其毛皮與吃其肉，本質上無分別，說殘忍一般殘忍。分別在肉類人人食，皮草並非人人買得起。名媛借慈善之名炫耀，本小姐穿得起而不穿，何等偉大。抵制皮草活動，原沒窮撚的事。
同樣，為什麼總聽見提醒別吃魚翅？紅衫魚也屬於「紅色（避免）」類別，卻很少提，因為賢達們志在show off自己割捨魚翅漱口習慣的慈悲呀，紅衫魚、大眼雞，咩來的？
傳統菲林生產和沖印，污染環境，但一旦備受文青追捧，稱之為情懷。正邪難以捉摸。
阿婆購物問攞多幾個膠袋，叫貪心、瞢塞、不辨是非；設計師阿茂整餅一件無用大膠，叫有型。
KAWS COMPANION樣衰，無論真環保抑或假環保，隨波逐流都欠資格，維港水尾，生不逢時。