「流浪地球」谷氣版，過去幾日，在中環與金鐘站上演。暈頭轉向的乘客，冇個似戰狼，焦慮敗走，急急搵轉車位置。搶救地球嗎？你OK我OK嗎？冇玩啦，個爛鬼系統更新，一而再，跣殘遲大到的打工仔，被迫搶救的，是自己份工。
記者形容乘客迷失中環。是翻抄「迷失東京」？邊個有咁好戲？迷走中環，流浪金鐘，兜兜轉轉，尋尋覓覓。香港人出晒名，為了返工，無所不用其極。超級颱風山竹犯港，翌日交通大癱瘓，打工仔各出奇謀，攀山越嶺，堅揪上班。但地鐵在所謂「黃金兩小時」的測試最新系統中出事，唔關超颱事，港鐵內部將個波踢來踢去，邊個接鑊？保證唔係陳局長和馬主席。港鐵這一次，個大名應該更紅，天文台考慮搵佢為颱風冠名，港鐵！港鐵！港鐵！打工仔聽見，知驚！山竹勁得滯，被永久除名，港鐵不會，港鐵高層不怕被理大校委那句「永不取錄」嚇窒。港鐵這次出事，撞車的破壞力，有相為憑，等同八號波，打工仔有強烈理由休假。年初車公靈簽是不是影射港鐵高層是粉腸呢？乘客（唔包括唔曉嘟機入閘的林鄭）識條鐵！