34歲嘅祖雲達斯球星基斯坦奴朗拿度（C朗）最近除咗備戰歐國外，仲有其他搞作。事關呢位球星有份投資嘅植髮中心，日前喺西班牙馬德里正式開幕喇。創辦人之一C朗出錢開中心，而佢女友佐真娜就負責「打骰」。C朗就話想幫人解決脫髮問題，如果有頭頂煩惱，每次收費盛惠4,000至7,000歐元（約3萬至6萬港元）。網民仲惡搞叫皇家馬德里新上任嘅光頭教練施丹，快啲去幫襯！
C朗休戰多時終於決定回歸國家隊，相隔8個半月回歸，代表葡萄牙出戰嚟緊兩場歐洲國家盃外圍賽。而C朗就喺周二報到，返到首都里斯本奧埃拉什訓練場操練（下圖），備戰周五對烏克蘭嘅比賽。