立法會噚日朝一早有會開，八方見到工黨立法會議員張超雄竟然要坐住輪椅開會，梗係關心佢究竟因乜事整傷同係咪好嚴重。原來佢前晚攙扶屋企人時候，唔小心扭傷條腰，開頭以為冇乜大礙，點知深夜痛到忍唔住，要立即去觀塘聯合醫院急診室求診，到噚日都行唔到，所似要坐住輪椅返立會開會。張超雄話醫生畀咗止痛藥同消炎藥佢食，又叫佢多啲休息，不過因為噚日衞生事務委員會討論由佢提出《罕見疾病條例草案》，之後工務小組委員會亦討論古洞北新發展區及粉嶺北新發展區項目，兩個都係佢肉緊嘅議題，所以即使坐住輪椅，佢都要撐住返去開會。