權威足球雜誌《法國足球》，日前公佈咗由佢哋評選出嚟嘅史上50大最佳主帥排名，荷蘭「全能足球之父」米高斯力壓曼聯傳奇費格遜而名列榜首，呢個連贏位相信唔會有太大反對聲音。不過喺現役主帥中，只係得哥迪奧拿同埋安察洛堤能夠打入10大，至於帶領阿仙奴多年，曾經締造英超全季不敗偉業嘅雲格就只係排名32，仲低過排27位嘅現任利物浦領隊高路普，呢個就惹嚟唔少爭議。
全能足球之父居首
《法國足球》係根據歷來所有足球主帥所贏得嘅獎盃、對賽事嘅影響、佢哋嘅個性同埋如何影響到後來足球教練咁多個因素，去決定最佳主帥排名。結果，曾經13次贏得英超聯賽冠軍、5次英格蘭足總盃冠軍、4次英格蘭聯賽盃冠軍，以及兩次歐聯冠軍嘅費格遜屈居第二；排喺已故「全能足球之父」米高斯之後。喺2005年離世，享年77歲嘅荷蘭人米高斯執教生涯有成32年，球員同教練生涯都幫過阿積士贏荷甲冠軍，收山轉任教練，帶領阿積士喺1971年贏得歐冠盃（歐聯前身）冠軍，之後亦轉投過巴塞隆拿任教。米高斯曾經出任荷蘭國家隊主帥，74年世盃有名將告魯夫在陣嘅荷蘭踢出精采全能足球，可惜喺決賽飲恨不敵西德，到88年總算還佢一個心願，贏得歐洲國家盃冠軍。
雲格排32位惹爭議
排喺第3同第4位係沙基同米高斯嘅得意弟子告魯夫，現役主帥中以排第五嘅曼城領隊哥迪奧拿最高，其次係排第八嘅拿玻里教練安察洛堤。在位22年，曾帶領阿仙奴3奪英超冠軍同7次贏英足盃嘅雲格，只係排32，就引起一啲爭議，雲格比高路普贏多三次英超冠軍，但排名就低五位；連馬體會主帥施蒙尼都仲高佢一位，難怪有網民戥雲格唔抵，認為呢個評選認受性唔夠。比雲格同高路普更高排名嘅仲有施丹，話晒佢都贏過三次歐聯，排名22相信都唔算好過份。