自由黨黨魁鍾國斌喺立法會問咗條有關一帶一路嘅口頭質詢，點知商經局副局長陳百里答完後全場鴉雀無聲、無人跟進，激到鍾國斌嬲晒豬咁話「我無嘢跟進！」
問題無用 無人在場 無人跟進
鍾國斌條問題係問政府，2016年成立咗嘅一帶一路辦公室做成點、將來搞啲乜等。雖然政府唔係派局長邱騰華答，但陳百里都無求求其其。點知陳百里答完，鍾國斌一起身就鬧，唔知自己條問題係太無聊定無用，議會內竟然無人跟進，甚至直頭係無人喺度。面對呢個咁空洞嘅議會，鍾國斌似乎都無力再糾纏，只能慨嘆：「咁重要嘅政策喺議會都無人跟進，我無嘢跟進﹗」陳百里可能想打圓場，佢一臉茫然起身問：「個跟進問題係……」鍾國斌無咁好氣，惟有講多次自己無嘢跟進。
建制派尤其是鍾國斌嘅黨友真係太不該喇，鍾國斌一片苦心問一帶一路，佢哋都唔擁護吓，點對得住香港、點對得住國家、點對得住習大大呢？