【黑鏡線索】
今篇主題，出自Paul Graham，佢係startup孵化器Y-combinator嘅創辦人，原文可搜尋"A Word to the Resourceful"。
揀呢個題目，因為佢個框架好實用，解釋到好多現象。之前提過，創業人之間，時不時會交流，將自己最頭痕嘅問題拋出嚟，問吓其他人意見。一來，公司話事人關心嘅難題，通常都係幾有趣，幾有挑戰性。二來，當你聽到原來人哋都有困難，你會覺得唔係自己先有問題。三來，好多時你幫手諗人哋嘅問題嘅時候，會忽然間解答埋自己嘅問題，幫人幫埋自己。
聽人提問，可以從旁觀察兩樣嘢：第一，問嘅係乜嘢類型問題。第二，提問嘅人對人哋意見嘅反應。觀察得多，會發現，唔同嘅創業人，問題同反應，可以有好大分別。
話事人取易捨難 逐末忘本
首先講講問題嘅類型，主要嘅分別，係層次嘅問題。通常，搵得其他人傾嘅，都係提問人最關切嘅問題。如果條問題係比較低層次，即係比較操作性，枝末類嘅，有兩個可能，一係就係間公司勁到最令話事人頭痛嘅嘢，只剩番啲相對細嘅事，一係就係明明有更重要嘅事情要解決，不過話事人選擇將個注意力放喺啲冇咁關鍵嘅事情上，而我估，大部份情況，都係後者居多。
咁點解有時會將注意力放喺枝末上？當然，聽起上嚟好明顯有啲奇怪，但人性總係取易捨難，叫得做枝末，即係牽一髮唔會動全身，亦即係容易執行，少啲阻力，於是索性將成棵樹嘅枝幹扁平化，當你唔再分主次，每件事都係同樣重量，咁要取易捨難，當然係處理枝末事抵啲。咁又點樣自圓其說？好簡單，說服自己夠親力親為，力不到不為財，就心安理得。呢類問題，通常發生喺話事人身上，因為佢上高已經冇人話畀佢聽要將心神放喺邊處，由得佢揀，咁佢揀嘅時候幾有紀律，就係佢嘅造化。
呢個係明知有主幹，但係選擇避開嘅情況。再差啲嘅情況，係根本唔為意有主幹嘅存在。
面對枝末類問題，畀意見嘅人，可以選擇照答。壞處係，你照答，除咗畀咗答案，仲可能令提問人誤會咗你認同件事係好重要，加劇咗個錯誤嘅比例感。所以一個坦白嘅做法，係反問點解佢覺得呢個問題咁重要，有陣時佢會自己發現，原來真係枝末得滯。
避開意見 始終都係要還
關於對意見嘅反應，你會發現，有啲人有時本能反應地避開意見，而根據Paul Graham觀察，係出於唔願意chase down all the implications，因為最終可能會推敲出一個自己唔想見到嘅結論。換句話講，有啲人如果感應到牽一髮會動全身，或者好困難，就會腳軟，而腳軟嘅反應，就係一開波就否定個意見。於是乎，創業人可能明明體能上年輕力壯，健步如飛，但係喺思維空間上，卻行得好似個阿毛咁慢。而大家心照，避得多，始終都係要還。
撰文：宋漢生