民主黨噚日舉行24周年黨慶，雖然冇請娥特同律政司司長鄭若驊，仲喺黨慶活動小冊子上批評特首只顧面向內地、配合內地，徹底忘記香港嘅成功係有賴香港核心價值；但多名特區政府官員繼續畀面出席酒會，包括政務司司長張建宗、財政司司長陳茂波，以及多名局長同特首辦主任陳國基。
大內總管︰佢話多啲出席囉
問到陳國基有乜訊息代娥特講，陳國基就話：「林太鼓勵我哋（官員）出席！」但就講明冇同娥特討論係咪要捐錢。陳國基又話，娥特只鼓勵官員多啲出席唔同政黨黨慶，要做到一視同仁。以往689冇獲民主黨邀請去黨慶，就下令所有官員唔准去，咁娥特係咪同689做法唔同？陳國基笑住話林太冇呢個規矩，至於娥特幾時開始鼓勵官員去民主黨黨慶呢？陳國基話娥特一早已講，「我哋話收到邀請啊！佢（林鄭）就話多啲出席囉！」話唔覺娥特有因為自己不獲邀請而唔開心。
其他現身黨慶的嘉賓，包括噚日接受卿姐訪問時，聲稱不便評論《逃犯條例》的劉鳴煒，佢噚日同卿姐重遇時，就笑言：「我冇甩底，冇嚇走，係咪先？」至於薯片叔曾俊華，就同肥仔聰同場現身，其間運房局局長陳帆主動上前吹水，建制派方面，要數自由黨最畀面，該黨田北俊、方剛同周梁淑怡都坐低食飯，前議員林大輝亦有現身。自由黨前議員田北俊、周梁淑怡和方剛，在晚宴尾聲與民主黨成員在台上合唱《朋友》一曲。該黨籌款委員會主席袁海文宣佈，昨晚籌款數字超出原定目標400萬元，共籌得420萬元。民主黨去年共籌得約500萬元，即今年冇邀請林鄭後，跌了約80萬。
李八方
