大家都知，瑞典球星伊巴謙莫域一向語出驚人，最近佢接受訪問，又大談前球會曼聯啲嘢，今次就爆話以尼維利兄弟、傑斯同史高斯為首嘅紅魔「92班」名宿，一向都唔鍾意現役隊內法國球星保羅普巴，覺得佢當年唔聽「師傅」費格遜支笛，出走太反骨，所以同費Sir係夾過或受到指使，先敢喺電視台成日公開批評普巴。
家陣效力緊美職聯洛杉磯銀河嘅伊巴，喺曼聯雖然只係度過咗季半左右，但都知統治咗球隊成26年嘅費Sir地位崇高，退咗休都仲好有影響力。佢最近受訪就戥當年同佢同一個夏天過檔曼聯嘅普巴唔抵，皆因呢位26歲法國球星喺2012年夏天嗰陣，因為同費Sir傾唔掂數去咗祖雲達斯，結果被費Sir同佢「92班」弟子視為反骨仔，就算四年後嘅夏天，佢高調咁以破紀錄身價回巢，都一樣唔受「92班」歡迎，加上有時表現飄忽，就更加備受加利尼維利同史高斯呢班任職電視台評述嘅名宿針對。
伊巴：92班受費Sir指使
伊巴受訪時就先講出對「92班」嘅不滿：「佢哋已經唔喺度，喺球會入面都唔活躍，所以就成日喺電視台投訴。」之後佢講到普巴，就彈咗個「費格遜圈子」嘅稱號嚟揶揄「92班」：「佢（普巴）好後生就喺曼聯，然後佢走咗先再返嚟。不過，喺『費格遜圈子』入面，佢哋唔鍾意咁樣，因為佢哋成世都跟住費格遜冇離開過，同埋如果費格遜唔叫佢哋開口，佢哋係唔會講曼聯，所以如果佢哋出聲插人，我就唔知係咪已經得到費格遜嘅批淮喇。」
普巴同球迷自拍
最明顯嘅例子，就係普巴早前喺摩連奴落台後喺ig上載慶祝相，加利佬好快走出嚟鬧佢冇道德，而史高斯亦曾經鬧過普巴踢波冇腦。伊巴呢番言論真唔真冇人知，但家陣返咗去法國國家隊報到嘅普巴就好開心，星期二喺國家隊嘅公開操練入面，應球迷要求不斷同佢哋玩自拍。其實摩佬走後，成隊曼聯表現都好好多，雖然話上星期英足盃出咗局，但歐聯入到8強同埋英超爭前4形勢都唔差，已經好大改善，難怪最近拉舒福特係咁讚看守主帥蘇斯克查，仲暗示如果繼續由摩佬教，一定冇可能有𠵱家嘅成績。