早喺2012年前已確診因為遺傳而患有糖尿病嘅社福界立法會議員邵家臻，噚日因為糖尿病上眼，被迫喺下月9日佔中判決前夕，入院做佢人生第一次手術。
阿臻噚日喺facebook透露，為咗預備下月可能要入監倉，早前去咗做身體檢查，點知唔check猶自可，一check就發覺糖尿失控、膽固醇超標、糖尿上眼，要盡快做手術。佢透露噚日打完第一針，下個月有第二針、再下個月有第三針，雖然佢下個月就要面對佔中判決，更加唔知道下個月判決後，到時自己處境係點、唔知到時仲打唔打到第二針？但佢都決定噚日做住手術先，始終病向淺中醫係最好。
噚日做完手術 今日即復工
八方問過阿臻，佢話噚日係佢咁大個仔第一次做手術，指醫生要打針入佢眼球白色位置，佢到𠵱家仲有少少刺痛，阿臻又引述醫生話手術後6個小時，痛楚先會慢慢紓緩，所以本來答應噚晚出席民主黨黨慶嘅阿臻話，惟有甩底唞唞，但佢話今日會即刻復工，因為今日係立會休會後復會，仲有行政長官質詢環節，佢話要爭取喺呢個環節質問娥特喎！