富商劉鑾雄早前因捲入澳門前運輸工務司歐文龍貪污案，俾澳門法院判囚，當時澳門曾提出要求引渡，但因為港澳冇引渡協議而冇成事。劉鑾雄個仔、青年發展委員會副主席劉鳴煒，噚日去劉慧卿嘅網台節目《議會內外》訪問，原先討論近期有關理大踢學生出校、大灣區發展等議題，但卿姐提到政府就《逃犯條例》修訂，問劉鳴煒有關商界的意見，劉鳴煒好醒咁即刻戴晒頭盔，「呢個課題我唔係好方便講，你又唔係唔識我老竇！」又話爸爸可能會受今次修例影響，所以佢自己唔會有中立意見，都係唔好表態。
劉鳴煒又話，佢冇向政府遞交意見書，因為覺得咁做就好似利用自己嘅身份幫自己謀取利益。之後劉慧卿再問佢對於有商界提出將商業罪行排除於外嘅時候，劉鳴煒認為政府應了解反對人士嘅意見，同埋建議能否釋除反對者疑慮，卿姐呢啲喺立法會同官員辯論咁多年嘅人，反應梗係快，即時食住上追問劉鳴煒：「你老竇好擔心呀？」搞到劉鳴煒唔知點好！