以衞冕省港盃功臣為班底嘅香港U22足球代表隊原定噚日直飛蒙古，準備星期五開波嘅U23亞錦賽G組外圍賽，但大軍去到赤鱲角機場，就接到航空公司通知，話蒙古天氣唔多穩定，航班取消，要今朝再起程。
足總前晚公佈出戰U23亞錦外嘅23人名單，球隊噚日朝喺將軍澳足球中心練完波，就坐車去機場準備搭三點半機直飛蒙古，但當地呢幾日天氣麻麻，航班臨時取消，而航空公司已通知今朝可以起程。港隊教練安頓就話，天氣嘅嘢冇人控制到，遲一日到蒙古應該要正面去睇，當然訓練程序亦有少少改動。呢位狂牛教頭又講得幾啱，賽事星期五先開波，仲有幾日適應當地約攝氏零度嘅天氣。呢班小港腳喺省港盃表現出好有朝氣，港隊今次外圍賽對住北韓、新加坡同蒙古，會決出小組首名同8組最佳4隊第2名晉級出年泰國嘅決賽周，港隊喺星期五揭幕戰會對新加坡。