上星期三冇中午飯局，一個人唔知去邊度食好，於是決定減肥，食咗兩個麵包，用咗16蚊搞掂一餐之後，就在中環搵路行，行到電車路南豐大廈對面，竟然碰到天真許，問佢：「同我一樣行街乎！」天真許答：「非也，我寫字樓就在這間大廈，食完飯返工呀！」
既然咁啱撞到正，於是多口問佢：「2019年股市大旺，升到飛起，記得你講過寫過股市逢9必升，依家恒生指數近二萬九千點嘞，幾時破三萬點？」答案出乎意料之外，大好友天真許竟然睇跌，佢講：「美股港股A股即將有大調整，買咗股票有利潤，不妨快啲止賺，等跌，跌完之後在低位再買入。」咁肯定，有乜根據呀，天真許話：「條街咁多人，好難一時講得清楚，股市開市，我亦唔得閒同你傾得耐，一於WhatsApp你。」
好吖，行咗數十分鐘之後，返回寫字房，慢慢再睇天真許送來嘅短訊，原來佢話根據「水星逆行假說」，每到水星逆行日子，如1973年，1974年，1987年，1989年的水星逆行期間皆出現四次急跌的經典例子（佢附埋走勢圖），下跌幅度由27%至44%不等，2019年3月5日至28日是今年第一個水星逆行周期，投資者必須提高警惕，當然上述見解，只供參考，大家投資買賣，必須審慎，自己量度風險。
一般分析師好少講到「水星逆行假說」（hypothesis），天真許話係在1994年用咗五十萬元向一位「財經星相學」人士換取回來嘅「秘笈招數」，佢自己就相信，朋友信唔信就係閣下嘅事，左丁山笑佢：「立此存照，好快就知。」
因波音飛機失事，導致波音股價大跌，市值蒸發280億美元，波音股東損失慘重，又問吓天真許點睇，佢話：「波音股價由1975年至2010年升幅不大，但之後節節上升，於2015年開始，更加好似坐咗火箭，直線向上至今，呢種走勢，非常危險，與蘋果股價走勢圖雷同，我稱之為『射水喉走勢』，必定見頂回落，依家咪趁壞消息急沽囉，仲有排跌。」世事就往往如此，一片好景之際突然發生想不到嘅意外，觸發恐慌，於是借勢下滑，一發不可收拾，股民走得快好世界！以股價喻人生，有相似處，人生得意盡歡之日，點知道竟然埋藏惡運噃，何志平往紐約之前，在香港會與非洲國家領事把酒言歡，點估到人到紐約就立即畀FBI拘押吖。