熱戀中嘅男女，最驚都係對方變心，忽然出去搞搞震。但若果話畀一眾女士知，如果從男方捧邊支球隊，就會知道佢係咪鍾意偷食，對女士們搵另一半係咪好有幫助先？據英國《太陽報》報道，英國有個網上調查訪問咗2,234名男球迷，研究佢哋究竟鍾意邊隊同埋有冇試過偷食，結果發現最多人偷食嘅竟然係家陣排包尾嘅哈特斯菲爾德球迷，而最忠誠嘅就係阿仙奴球迷。
十個哈迷七個偷食
調查發現，喺二千幾名球迷入面，話自己捧哈特斯菲爾德嘅球迷，竟然有69%都曾經試過偷食，差唔多每10個哈特斯菲嘅男球迷入面，就有七個曾經出軌。雖然今季哈特斯菲爾德成績差到爆，家陣已經俾尾3嘅卡迪夫城拋離14分之多，降班都只係時間問題，不過今次調查一出爐，佢哋終於都有樣嘢可以力壓英超其餘19支球隊。至於排第二嘅，就係排緊英超榜首，仲邁向緊「四冠王」嘅曼城，僅僅以2%之差輸畀哈特斯菲爾德，有成67%球迷試過偷食，而第三就係修咸頓，都有66%球迷認自己曾經偷食。
咁其他Big 6嘅情況又點呢？車路士球迷有59%、熱刺球迷有52%、曼聯球迷就有44%、利物浦球迷都有39%，阿仙奴球迷就以32%喺呢個調查入面墊底，成為20支英超球隊入面、對另一半最忠誠嘅球迷，或者係一眾阿迷拎得最開心嘅包尾。嗱，方力申都係出晒名嘅阿仙奴球迷，呢個調查準唔準，大家心中有數啦！
方力申表忠得啖笑
唔少阿迷喺網上見到結果之後，紛紛都表示以阿迷呢個身份為榮。不過，同時亦有唔少廠迷自嘲，話阿仙奴由高貝利搬咗去阿聯酋球場之後，球隊就由爭標球隊變成爭前四球隊，而且之前就試過九年無冠，買人又成日險簽，呢幾年球隊搞成咁，自己都仲捧緊，唔專一就假。不過，數據只供參考，而且都唔係精密統計，唔少網民都抽水話呢個調查只係「鬥講真話」，最誠實嘅反而係哈特斯菲爾德球迷，所以，大家都係要帶眼識人呀！
