剛喺1月結束嘅村代表選舉，相信市民未必知道到底有乜人當選，但廉政公署推出嘅維護鄉郊選舉廉潔宣傳片，或者令大家記憶猶新，皆因劇中涉賄選嘅「壞人」所着嘅衫同民建聯藍加橙嘅黨背心「撞衫」，惹嚟民建聯投訴有影射之嫌。有網民發現，最近無法喺廉署頻道重溫呢段寫實宣傳片，質疑影因民建聯詐型所以俾ICAC鏟走，相反2015年嘅村選宣傳片仍然有得播。
廉署︰服飾引起誤會而修改
睇番去年底民建聯投訴後，廉署回覆時話冇其他考量，旨在以輕鬆手法宣傳，企硬冇將影片下架，但有網民發現喺1月中播出嘅短片，原本「壞人」着住嘅藍加橙背心，離奇「甩色」變為灰加橙，令人懷疑廉署雖然冇將影片下架，但偷偷哋做咗手腳避嫌？再加上今屆嘅村選宣傳片全部被鏟走，更令人覺得事有蹺蹊，就算話村選完咗唔播，咁點解2015年嗰屆村選嘅片仲健在？
廉署發言人就回覆八方，話較早前推出三條鄉郊廉潔選舉宣傳短片後，留意到市民意見同接獲傳媒查詢後，「因應部份演員服飾或引起不必要的誤會而作出適當修改」，間接證實甩色係人為。發言人並指村選結束，相關宣傳亦完結，如有需要例如進行補選，會考慮再將短片放喺適當平台播放，但始終冇講明點解2015年啲宣傳片冇被鏟走。
李八方