今年區議會選舉11月24日舉行，公民黨料派24人出戰，噚日率先介紹一班積極考慮參加區選、嚟自唔同地區嘅社區發展主任見傳媒，佢哋主打「公道社區」訊息，防止區議會再推動浪費公帑嘅小白象工程，其中最搶鏡嘅係有啲明星相、今年25歲嘅中大社工系學生李予信，阿信發言時甚有台型，自我介紹後就被在場記者包圍追訪；有記者問佢有冇被人話似邊個明星？略帶怕醜嘅阿信回應「余文樂」，佢原來仲有跳街舞，又話想同另一政壇「舞者」鄺俊宇較量下。
2016年立法會選舉時幫過陳淑莊喺港島區助選嘅阿信，去年底加入公民黨後，一直拍住「師傅」鄭達鴻喺「紅區」北角開展地區工作，佢話決定投身社區係受到老師、中大教授陳健民影響，透露學期內最高分嗰科就係陳健民教嘅「民主與社會」。
蔡素玉或交棒
阿信正積極考慮喺民建聯蔡素玉嘅地頭、福建人聚居嘅錦屏選區出戰；但有地區消息話蔡菜子可能喺年底交棒，「余文樂」惡鬥「蔡菜子」嘅戲碼未必會上演。
講返阿信，原來佢仲有另一個身份，就係「街頭舞者」，去年12月更喺中大首屆街舞比賽中贏得冠軍，最擅長跳霹靂舞。對於政壇另一知名「舞者」、已轉型做愛情小說作家嘅白鴿黨鄺俊宇嘅舞藝，阿信不諱言「有機會我都好想同佢較量一下」，佢話鄺神對霹靂舞都好有認識：「佢喺十幾年前已經有呢個水平，我係好欣賞！」
李八方