老莫按捺不住，向我投訴：老陳有啲friends都好過份，喺佢背後唔係講佢壞話；而係指證佢點樣篤席上眾人背脊，人人全信，老陳即刻打入冷宮；真係毒！
真係毒、毒舌第一等！不講缺席的第三者是非，而將第三者批評席中眾人、真假並未被鑑定的是非內容在席上鋪陳；沒幾個成熟人對有關別人的是非有興趣。但再成熟的人對背後被批評、被抹黑都會豎起耳朵並一條心吸收一分一毫與己攸關頂心刺。這類毒舌成功率Number One！
加在一起幾百歲的人，還需是非度日？啲所謂friends講啫，都用腦分析箇中原委，話聽兩邊；其實人人都對老陳有意見，不論是非黑白，一條心實實地跟着反面聲音。
三等毒舌：潑婦罵街，無理取鬧。二等毒舌：中傷朋友，是非當人情。一等毒舌：阿邊個背後話你點、點、點，滲毒程度百發百中，意欲摒棄、陷害其他人？必勝！
當年利智初上位，胡雪姬於選舉之前已邀請在下為當屆亞姐製作形像，得機會近距離接近一眾燕瘦環肥。比較喜歡鬼妹仔性格兼可塑性強陳奕詩，當選豬頭骨「友誼小姐」。鬼馬多端李志超孖我負責造型，拉隊去陳的母校、堅道舊聖心書院校園為《號外》拍攝特輯，拍至修女出來落閘放狗。
利智玲瓏浮突、肌膚勝雪、白白滑滑的美比較適合古人，所以倪匡叔叔堅稱Nina為「五十年難得一見的美人」，也肯定適合今天網絡世道宅男。在下比較欣賞她的英文名；Nina Li Chi與巴黎古老名牌Nina Ricci犯同音之妙。
不少人記得 1986年6月21日亞姐選舉之夜，問答環節，利智嚇窒港人面對廣大觀眾向司儀發言：你有陰毛嘅，你地話係唔係？自此被封為潮語始祖！利智令我刮目相看為其EQ，當毒舌在香港未那麼流行，港人仍存幾分厚道的歲月，利智開始上位，某次出現大型活動，甫登場即引來噓聲四射；主持人問：對群眾的噓爆如何解釋？不徐不疾，向前輩狄娜學習上氣唔接下氣，她答：有噓聲咩？我淨係聽到歡呼聲咋喎……
即時封佢做偶像，一下間將謔笑者收歸為粉絲，包括在下。