施丹回歸，皇馬反彈。皇家馬德里喺上周六西甲聯賽主場迎戰切爾達，亦係九冠主帥施丹回歸後嘅首場比賽。「舊人事舊作風」，施丹返嚟，昔日佢嘅四名愛將，艾斯高、馬高阿辛斯奧、馬些路同埋基羅拿華斯，仲有加里夫巴利全部正選披甲，結果以2:0擊敗切爾達順利開齋，其中艾斯高同巴利爭氣入波。
皇馬今季三大皆空機會好大，西盃同歐聯出局，喺西甲贏埋今場波都仲落後榜首巴塞大約10分，所以喺上季季後突然請辭嘅施丹，接替蘇拿利後喺餘下11場波嘅任務都好簡單，保住前四下季繼續踢歐聯就收貨。
高圖爾斯坐冷板
情況好似蘇斯克查接任曼聯咁，施丹都明白到要隊波復蘇，提升隊內士氣最重要，最有效方法梗係用番晒之前三奪歐聯冠軍嘅一班功臣，所以上周六迎戰切爾達，正選陣容見番晒佢啲愛將，被前主帥蘇拿利棄用嘅守將馬些路同中場艾斯高，加埋門將基羅拿華斯以及前鋒馬高阿辛斯奧一齊擔正；至於被傳同施丹之前已經鬧翻嘅加里夫巴利，亦稍令人意外以正選披甲。今季加盟失波勁多嘅門將泰拔高圖爾斯，同埋蘇拿利鍾意用嘅後防小將利古朗，齊齊坐冷板凳。
巴利正選有波入
皇馬上半場形勢雖佔上風，但進攻唔算到肉，要到下半場17分鐘先打破僵局，阿辛斯奧中路突破後傳畀賓施馬，後者再底線傳中由艾斯高射入，相隔成半年終於再喺西甲入波。踢到77分鐘皇馬再添紀錄，馬些路招牌式由左路殺上前場，交畀禁區內嘅巴利右腳地波射入奠定2:0勝局。一眾棄將進攻有貨交，防守保清白之身，助回歸嘅施丹旗開得勝。加上同日次席嘅馬德里體育會意外作客0:2不敵畢爾包，目前皇馬只係落後馬體會兩分，再發力就算爭唔到冠軍，隨時有機會拎番個亞軍。
施丹賽後大讚眾將表現出色，但亦透露季後會執吓隊波：「今場波所有球員都顯示出佢哋嘅實力，好似拿華斯、艾斯高、馬些路同阿辛斯奧呢班今季上陣機會唔多嘅球員。到咗季後我會再進行人腳變動，但現階段我唔會透露邊個會走邊個會留。」