禮賓府噚日舉行開放日，百幾名市民一早排隊等入去參觀，不過就唔係所有市民都可以入場，好似「女長毛」雷玉蓮諗住入去向特首林鄭月娥抗議港府修訂逃犯條例，去到安檢已經被保安截住，最後仲俾警員抬走。
市民送畫 娥特拒收
女長毛噚日排隊去到安檢，保安以佢帶同纓槍為由，唔畀佢入禮賓府，呢個時候女長毛喺個袋拎出一個平日警察笠疑犯嘅黑頭套笠住自己，之後大叫抗議逃犯條例嘅口號，在場班保安梗係阻止佢同叫佢走，但似乎冇辦法搞得掂女長毛，最後唯有叫差人抬佢出禮賓府大門口。
保安咁嚴密，娥特自然放心行出禮賓府見市民做親民show，不過在場仲有大班記者，個個問佢23條立法、修訂逃犯條例，娥特一概唔答，但就用十幾分鐘同市民合照，有一位坐輪椅嘅市民向娥特送上一張佢自己畫、同娥特一齊「合照」嘅畫作，娥特同佢傾完偈之後唔肯收，不過呢位市民冇嬲，仲讚林鄭為香港犧牲同家人相處時間。