上周六英足盃首場八強比賽，由兩支英超球隊對碰，結果屈福特靠前鋒安達格雷後備出場兩分鐘就建奇功，以2:1踢走水晶宮，率先闖入四強。呢場係一場過嘅比賽，邊隊贏就入到四強，兩支球隊都派咗唔少主力出戰，上半場27分鐘，主場嘅屈福特開出右邊角球，由伊天卡普爾喺混戰中射入，上半場領先一粒。下半場水晶宮反撲，麥斯美亞同安祖斯唐辛都有攻門，但都先後俾主隊門將靴里奴高美斯化解，踢到62分鐘，屈褔特守將控甩波，巴舒亞伊搶走個波後長驅直進，殺入禁區破網追成1:1平手。點知去到79分鐘，屈福特後備奇兵安達格雷接應羅拔圖佩雷拉妙傳，喺禁區入面球不着地窩利破網，幫屈褔特2:1贏波，率先晉級四強。