曼聯名宿史高斯喺二月開始擔任英乙球隊奧咸領隊，但佢周四後就宣佈離隊，結束短短31日嘅執教生涯。咁快走人或者係同奧咸嘅戰績有關，事關史高斯執教後第一場雖然喺主場以4:1大炒伊奧維，但之後連續六場聯賽都未贏過，只得3和3負。目前奧咸排喺英乙第14位，同第7位嘅高車士打差成9分，升上英甲機會唔大。史高斯就表示︰「我已經唔能夠依照自己當初嘅意願去執教，喺任職之前更加受到誤導。」唔知咁講係咩意思呢？有指佢其實係頂唔順球會先咁快走人，包括冇安排隊巴接載職球員去客場比賽，同埋要求球員自己洗衫，但最難頂嘅係班主蘭沙甘會喺職球員口中打探史高斯嘅排陣，然後再進行干預。據聞史高斯成日收到班主嘅電郵，建議佢要派邊啲球員上陣，結果史高斯決定走人。