到底基斯坦奴朗拿度（C朗）同美斯邊個先係球王呢？呢個問題大家討論咗成十幾年都仲講緊，而退咗休嘅意大利教練卡比路（小圖）最近都發表吓意見，指美斯係現今球壇唯一嘅天才，C朗雖然都好勁，但「天才」兩個字唔關佢事咁話。卡比路喺接受意大利《天空體育》訪問時就話：「C朗係位非凡嘅球員，不過美斯係天才。我認為足球歷史上出現過三位天才：比利、馬勒當拿同美斯。C朗雖然可以為球隊贏到所有嘅錦標，不過美斯先係貨真價實嘅天才。」佢又話︰「我曾經親眼見過16歲嘅美斯，佢當時已經踢到𠵱家咁叻。美斯可以喺球場上創造一啲其他人諗唔到嘅事物，天生簡直就係個足球天才。雖然C朗努力令自己成為冠軍級人物，但佢唔係呢種能夠創造事物嘅天才。」