上年先至由西甲馬德里體育會轉投中超大連一方嘅阿根廷中場奧斯華度加坦，星期五就落實免費轉投美職聯芝加哥火燄，將會同前德國國腳舒韋恩史迪加做隊友。現年31歲嘅加坦上年同馬體會隊友恩歷克卡拉斯高齊齊過檔大連一方掘金，成為一時嘅焦點，不過佢哋首戰就以0:8輸咗畀上海上港。縱觀全季加坦嘅表現都只係麻麻地箒，上季喺中超上陣28次入得兩球，最終球隊排第11位留喺下半版。大連一方今季又重金撬咗拿玻里隊長咸錫過檔，加坦就更加冇得留低，結果加盟一季之後就決定離隊他投。芝加哥火燄教練柏奴域就話：「加坦係一位好出色嘅球員，我相信佢有能力摧毀任何一支美職聯球隊嘅後防。」話時話，大連一方都真係冇改錯名，今次轉會費都唔要，免費就送走加坦，名副其實夠晒「大方」。