公民黨黨魁楊岳橋早前因未有及時返回議事廳，搞到佢嘅「檢討單程證政策」未能夠動議，仲被人改花名叫「關鍵缺席」，楊岳橋最終道歉，並知道可再動議嘅機會不大。天無絕人之路，原本向「放生梁振英」嘅律政司司長鄭若驊提出不信任動議嘅公民黨郭榮鏗，決定放生鄭若驊，將自己抽中嘅辯論時段送畀楊岳橋，畀佢可以補鑊，不過鄭若驊咪高興得咁快，以為岳少放過佢，因新動議仍然追住佢打。
立法會秘書處近日公佈，嚟緊議員動議辯論嘅時段分配；已三次未能抽中嘅郭榮鏗，近日終於抽中，原本可以喺本月27日提出不信任動議，以示不滿鄭若驊喺冇尋求外間法律意見下，就放生收取澳洲公司UGL 5,000萬元嘅前特首梁振英。但郭榮鏗決定將時段送畀楊岳橋，而郭榮鏗向鄭若驊提出嘅不信任動議，已經唔再喺名單上。
郭榮鏗讓路 稱因應黨內協調
郭榮鏗同八方講回應話，今次調動係因應黨內協調，加上早前喺事務委員會佢已向鄭若驊提出不信任動議，所以唔再提，不過鄭若驊咪開心得咁快，因為郭榮鏗同八方講，楊岳橋唔會用呢個時段提出有關新移民嘅動議，而會改為提出關注修改移交逃犯條例嘅動議辯論，即係話即使唔提對鄭若驊提出不信任動議，新動議仍關鄭若驊事，仲會燒埋保安局局長李家超！