台灣高雄市長韓國瑜前排開晒口話要嚟香港,雖然賽馬會請咗佢食檸檬,不過唔緊要,據報娥特會喺今個月22日親自見佢,唔單止娥特,連中聯辦主任王志民都會見佢﹗咁就真係巴閉咯,國民黨嘅韓國瑜同共產黨嘅王志民,居然喺一國兩制下的香港碰頭,真係別具政治含義。
有指港府用最高規格接待
據台灣報道,韓國瑜會喺本月22至28號出訪,其間訪問香港、澳門、廈門等,22號第一站就先嚟香港,到時林鄭會喺禮賓府接見韓國瑜等人,報道形容呢次港府係用上最高規格接待,但又唔算係特別待遇,因為以前馬英九、郝龍斌做台北市長時,香港特首都係用同一規格。
而中央社嘅報道就仲犀利,話從高雄市府嘅公佈,韓國瑜22號啟程去香港,23號去澳門,喺香港行程中有兩個活動係唔開放採訪嘅,包括晚餐同埋市政建設參訪同拜會和信集團,中央社仲話唔排除中聯辦主任王志民都會見韓國瑜,佢哋亦問過高雄市府新聞局長王淺秋,王淺秋就以短訊回覆表示呢次行程「由中聯辦安排,我們是受邀方,尊重」。真係言簡意賅嘅回應,若果真係成事,呢次仲唔係相當微妙嘅中港台一家親?