許冠傑大仔、獨立歌手許懷欣人生向來無風無浪，不煙不酒冇大病，去年忽然在仔細老婆嫩的42歲，驚患膀胱癌。幸好早發現早切割，免除做人工膀胱之苦，許懷欣四個月消減了30磅，走過視為人生最大挑戰，正能量面對，唱住歌仔感恩每一天。正如他心愛的木結他一樣，「有啲wear and tear，先有personality喺度」。
撰文：林妙萍
攝影：周樂恒
場地提供：紅樓Redhouse
許懷欣日前受訪：「我會keep going！Don't worry, be happy。」剛完成手術後三個月的膀胱癌覆診檢查，醫生叮囑許懷欣不能太操勞走動，他依然準備了木結他唱歌。事實上，去年11月發現有癌症至今，他盡量繼續手頭工作，如上月「阿Sam & 阿Tam演唱會」巡演澳門站。
小便有血
「做咗第三個月check-up，so far so good，暫時冇嘢翻發，所以好開心可以返番日常生活。如果有翻發，就再cut咗佢。因為早發生，我都可以當係一個wake-up call，可以focus番去自己身體，食好啲、做多啲運動，be positive，因為早發現，我唔使食藥或做其他嘢（化療），只係做check-up，算好好彩。」
許懷欣指醫生都冇法解釋為何會生癌，皆因自己不煙不酒，也非在化學廠做，不算高危一族，他因為小便有血，入院檢查才發現，「開頭以為係腎問題，但一做個CT scan，就見到膀胱有粒嘢喺度，係一粒8mm，即刻入醫院啦，第二日做微創手術cut出嚟，拎去化驗所做test，發覺嗰粒嘢係stage O嘅cancer。」
不幸中之大幸，皆因許懷欣去年有三個同樣40多歲的朋友患癌，也有70幾歲uncle因膀胱癌太嚴重，需要切去膀胱，再以小腸重做膀胱。「入醫院嗰一刻，未confirm情況，知道咗之後，我太太都有喊，大家都好擔心，我都有啲擔心喎，一聽到cancer個字，個心會開始跳啦，and then會諗，我嘅時間係點呢？我個life係點呢？我會唔會去到呢個stage？」
計劃搞騷
The Rolling Stones結他手Keith Richards的名模太太Patti Hansen，2010年曾患上膀胱癌，許懷欣感激上天看顧，做完手術唞了兩星期就可以復工，再玩自己喜歡的音樂，「我珍惜每一日、每一次上台、每一個家庭聚會，所有嘢都好感恩，感恩每日有咁嘅機會同囝囝一齊玩。」音樂之外，多年來為其他歌手做過CD封套、紀念tee、新書封面等，多才多藝，也計劃搞一場art show，要做的事還有很多。
木結他彈Indie Rock
成長在音樂之家，許懷欣第一支結他由uncle泰迪羅賓所送，又買又賣，現時存有七支結他，最愛手上的木結他，「07年買，喺通利掛喺度，好多人玩過但冇買，但木結他係玩得多越好聲。佢係my baby，我帶過去好多地方走埠做騷，對我好有meaning，每支結他都有佢嘅故事。」
許懷欣彈住唱出新作《Wake Up！》，形容自己是Indie Rock，在木結他的溫柔和電結他的punk & rock中找平衡，許懷欣正將這場病的經歷，當作豐富創作的人生故事之章，「爸爸嘅歌詞、卜戴倫（Bob Dylan）嘅歌詞都好啟發我，好多我喜歡嘅音樂人都經歷高低，都會繼續push自己創作，挑戰自己去next level，我都會將負面變正面力量。」
更多精采時尚內容，盡在 http://add.appledaily.com。