【黑鏡線索】
前排財政預算案，見有科技業界人士，話政府啲乜券物券嗰啲億，落唔到自己袋，因為申請程序太繁複，只係會益咗啲有資源填表嘅公司，同埋一心一意尋租、價低者得嘅人。言下之意，係自己呢亭實力派做實事嘅公司，受惠唔到，好唔抵。
先講申請程序，以一貫官僚作風，應該真係幾繁複吓。政府不嬲都有畀科技界唔同形式資助，喺我認識嘅公司入面，唔少係因為怕煩而冇報，有啲仲係報報吓頂唔順放棄咗。事關startups通常都係好缺時間，做乜都要計機會成本，掉番轉頭睇，計完數發覺唔值得同官僚糾纏嘅公司，反映出佢哋對自己嘅時間價值，至少高到一個點，與其問政府攞不如自己賺好過。
業界龍頭八段錦App 獲數百萬資助
我一向對政府攞納稅人錢，嚟資助某啲產業，抱懷疑態度。前排睇到一個專訪，訪問創科界名人蕭逸。蕭逸係科技界前輩，九幾年已經喺第一期互聯網熱潮，創辦做寄存網頁嘅Cybercity。之後做企業電郵Outblaze，被IBM收購。無可置疑，蕭逸係香港科網頂級人物，成就會寫入本地科技界史冊。
有趣嘅係，訪問之中，講到佢後來創辦咗手機遊戲公司Animoca，仲喺澳洲上埋市。而Animoca其中一個項目，就係上年新聞「天價資助八段錦App」嘅嗰個八段錦健康遊戲，攞咗政府452萬嘅資助。蕭逸喺言談中，流露出對批評者嘅不滿：「儘管大家都未必了解過該項目內容及設計，便很快作出判斷……是我們沒考慮到部份港人現時心態。」
我之前冇留意係背後邊間公司，對單新聞冇乜大感覺。但睇到個訪問先知原來係蕭逸。蕭逸喎，業界頂級前輩，佢間遊戲公司上埋市，政府竟然走去資助佢整隻app？容許我打個可能誇張咗嘅比喻，咁咪即係電影基金攞幾百萬納稅人錢資助杜琪峯拍戲？咁成個資助嘅理念係乜？
有人話，咁啲錢如果批咗之後，爛咗尾，冇app出街，政府咪好樣衰，好似把關不力？呢個正正係政府資助公司嘅尷尬。如果畀間未必做到、往績唔夠勁嘅新公司，可能爛尾。但係如果畀間一定做得出，好多成功經驗嘅，咁成功又點解要資助佢？
蕭逸回應葡萄：初創唔敢申請
當然，政府推出得個計劃，Animoca覺得值得花時間去填表攞錢，無可厚非，袋番幾百萬幫補。政府批咗，亦都唔係Animoca嘅錯。最大問題係，好多聲音叫政府做吓嘢，幫手搞好創科業，咁政府就撥吓錢，宣佈資助幾多幾多億，然後就有人尋租袋落袋，其他人就葡萄點解落唔到袋，咁之後香港科技界係咪就會勁咗？只係國王的新衣。
蕭逸喺訪問中，話觀察到不少本地初創不敢申請資助，「他們擔心外界覺得公司加入政府陣營，甚至受其控制，為甚麼要看得如此負面呢？……他們不信政府……不信權威；當你不信一切，看事情就會變得消極。」點解香港人近年特別唔信政府？點解政府咁失敗，派錢啲人都唔信？蕭逸冇正面提供答案，不過就舉咗兩個反例，北歐芬蘭同美國矽谷，唔知係咪弦外之音，自己領悟。
好有可能，未來嘅呢啲幾多億幾多億，會分畀所謂「新香港人」，去幫厲害國執行乜嘢「20XX」任務，到時，我諗我會懷念，本地薑Animoca仲攞得到資助嘅日子。
撰文：宋漢生