今年69歲嘅工聯會「MC興」王國興上屆立法會選舉慘敗後，仍然不甘寂寞議論時政，佢噚日下午突然「無厘頭」喺自己facebook專頁同透過WhastApp，向網友同傳媒分享一段佢聲稱由民建聯「蔡菜子」蔡素玉今朝轉發畀佢嘅短片，仲話係一輯非常珍貴嘅片，強調係「一代宗師李小龍在擂台擊敗時為前韓國冠軍拳手的三個拳賽回合實錄」，仲大讚李小龍片中嘅「拳法、脚法、肘法、步法、腰馬令人大開眼界」。MC興仲叫大家一齊轉發分享、紀念中國武術一代宗師李小龍先生！仲話要藉此呼籲港府建立李小龍紀念館。
點知大家唔睇猶自可，一睇就笑咗，MC興呢段所謂「珍貴實錄」，竟然係一段正常人都睇得出嘅打機片段！根據網民提供資料，其實條片係錄製自 EA Sport嘅《UFC 2》遊戲畫面，唔少網民睇到MC興呢個珍貴「分享」都紛紛留言恥笑，話佢知呢段其實係動畫片，仲話蔡菜子呢次「真係跣到佢（王國興）好應」，仲有網民話片中韓國拳手林玄奎1985年出世，而李小龍1973年去世，咁佢哋兩個點可以對打？而且條片點睇都唔可能係1973年前拍攝，質疑王國興唔係咁都睇唔出吓？
王國興則喺發片後約20分鐘方知「出事」，即時喺facebook刪除呢段「珍貴實錄」，再喺WhatsApp發出「致歉通告」，內容為：「剛轉發李小龍比賽短片後、收到多人來電指正、該片是打機短片。謹此就錯發致歉！王國興謹啓」。
大家若然想睇MC興分享嘅「珍貴實錄」，可去以下連結： https://www.youtube.com/watch?v=pxajP8_m3zc
李八方