民主派上屆區選喺沙田區表現理想，區議員人數僅比建制派少一席，唔少民主派嘅區議員席位，自然成為建制派虎視眈眈目標。
最近傳出會落戶沙田烏溪沙選區、更喺港鐵大賣燈箱廣告嘅民建聯社區主任吳卓璟，就被網民質疑想「渾水摸魚」，唔明點解佢喺個廣告入面，並無標明佢所屬嘅香港第一大黨民建聯標誌，令該網民不禁問句：「唔Key logo就以為人哋唔知你係民建聯呀？」
重本落港鐵燈箱廣告
一個港鐵燈箱廣告應該唔平，點解一個地區主任有咁多資源？如果唔係民建聯，相信未必負擔到，偏偏廣告就冇民建聯logo，乜呢個logo會趕客咩？點解唔光明正大啲呀？有網民話如果漏咗，「不如幫佢貼番個禮義廉logo」。
八方問過當區現時嘅民主派區議員李永成，佢話約三、四個月前開始見到吳卓璟喺該區活動，近日都有街坊同佢講，留意到吳上述嘅燈箱廣告，問佢點解對方唔落民建聯logo，「查實我自己都好想知點解」，但同時苦笑話，自己就冇咁多錢登港鐵廣告嘞！八方根據燈箱廣告上資料致電過吳卓璟，但電話連續三次都係未能接通；睇番佢喺區內嘅活動宣傳單張，都有民建聯個招牌，唔知佢呢種宣傳，到底係咩玩法？